– राज चिंचणकर
‘तेरा दिवस प्रेमाचे’ या नव्याकोऱ्या नाटकाच्या निमित्ताने मराठी रंगभूमीवर शुभारंभाच्या सलग सहा दिवसांच्या प्रयोगांचा योग जुळून आला आहे.
नाटककार आनंद म्हसवेकर लिखित व शिरीष राणे दिग्दर्शित हे नाटक १६ ऑगस्ट रोजी रंगभूमीवर येत आहे. या दिवशी रात्री ८ वाजता शिवाजी मंदिर येथे या नाटकाचा शुभारंभ झाल्यावर सावित्रीबाई फुले नाट्यगृह (१७ ऑगस्ट), गडकरी रंगायतन (१८ ऑगस्ट), कालिदास नाट्यगृह (१९ ऑगस्ट), प्रबोधनकार ठाकरे नाटयगृह (२० ऑगस्ट) आणि २१ ऑगस्ट रोजी पुन्हा शिवाजी मंदिर असे हे सहा दिवस सलग प्रयोग रंगणार आहेत.
आनंद म्हसवेकर यांचे हे २२ वे व्यावसायिक नाटक आहे. या नाटकाचे वैशिष्ट्य म्हणजे, एक गंभीर विषय त्यांनी विनोदी पद्धतीने या नाटकात मांडला आहे. या नाटकाच्या निमित्ताने ज्येष्ठ अभिनेते अरुण नलावडे पुन्हा एकदा रंगभूमीवर येत आहेत. अरुण नलावडे यांच्यासह माधवी दाभोळकर, संजय क्षेमकल्याणी, शर्वरी गायकवाड, मेघना साने, देवेश काळे व संजय देशपांडे हे कलाकार या नाटकात भूमिका साकारत आहेत.
‘प्रयोग फॅक्टरी’ निर्मित व ‘जिव्हाळा’ प्रकाशित या नाटकाच्या निर्मात्या अनुराधा सामंत या आहेत. संदेश बेंद्रे यांनी या नाटकाच्या नेपथ्याची जबाबदारी सांभाळली आहे. मयुरेश माडगांवकर यांचे पार्श्वसंगीत; तर विनय आनंद यांची प्रकाशयोजना आहे. कार्यकारी निर्माता म्हणून विनय म्हसवेकर हे काम पाहात आहेत.
