सध्याच्या काळात स्वतःची मुले असूनही, आई-वडिलांना आश्रितासारखे जगावे लागते. अशा काही घटना समाजात प्रकर्षाने दिसून येतात. याबाबत समाजाला जागृत करण्यासाठी ‘मी.. माझे.. मला…’ या नाटकाने पुढाकार घेतला आहे. आत्मकेंद्रित वृत्तीच्याही पलीकडे जाऊन आपण समाजाचे काही देणे लागतो, असा सुसंस्कार करणारे हे नवीन नाटक आता रंगभूमीवर आले आहे.

       या नाटकाचे लेखन आनंद म्हसवेकर यांनी केले असून, विजय गोखले यांनी दिग्दर्शन केले आहे. किशोर सावंत आणि विवेक नाईक यांच्या ‘किवी प्रॉडक्शन्स’ या नाट्यसंस्थेने या नाटकाची निर्मिती केली आहे. विघ्नेश जोशी, विजय गोखले, किशोर सावंत, विलास गुर्जर, सुरेखा कुडची, हेमांगी राव आणि रोहित मोहिते यांच्या या नाटकात भूमिका आहेत. अनिकेत  शुभम यांचे संगीत, देवाशिष भरवडे यांचे नेपथ्य, अमोघ फडके यांची प्रकाशयोजना या नाटकाला लाभली आहे. या नाटकाचे व्यवस्थापन प्रवीण दळवी यांनी सांभाळले आहे.